Тоя же зимы декабря в 13 день в понедельник, нача князь великий Иван помышлять женитися. И советовал о том со отцем своим с Макарием митрополитом всея Русии. И митрополит о том назавтрее того во вторник после завутрени в соборныя церкви у Пречитыя[403] молебны пел. Да во вторник же у митрополита все бояре были, и те, которые в опале были по митрополичей по них присылке[404]. И с митрополитом те все бояре у великого князя были. И выйдоша от великого князя радостны.

И декабря в 17 день в пятницу были у великого князя митрополит и все бояре. Князь же великий перед бояры рек митрополиту: милостью Божиею и Пречистые Его Царицы Богоматери, великих чудотворцев Петра[405] и Алексия[406], Ионы[407] и Сергия чудотворца[408] и всех святых русских чудотворцев молитвами и милостью, положил на них упование, а у тебя, отца своего, благословяся, помыслил есми женитися. И яз по твоему благословению умыслил и хощу женитися где мне Бог благоволит и Пречистая Его Богоматерь и чудотворцы русские земли. А помышлял есми женитися в иных царствах у короля у которого, или у царя у которого. И аз, отче, тое мысль отложил. В иных государствах не хочу женитися, для того что аз без отца своего государя великого князя Василия и своей матери остался мал[409]. Привести мне за себя жену из иного государства и у нас норовы будут разные и помежу нами тщета будет. И аз, отче, умыслил и хочу женитися в своем государстве у кого мне Бог благоволит по твоему благословению.

Митрополит же и бояре от радости заплакали, увидяше такого государя младосуща, а ни с кем советоющася разве Божия промысла, таков благой помысл хотяще исполнити. И рече ему митрополит: Бог тебя царя и государя и Пречистая Его Мати и все чудотворцы благословляют такой великий и добрый помысл совершить. Да и аз, грешный, благословляю тебя женитися где государь умыслишь, по Божию строению. А будь на тебе на государе Божия милость и наше грешных благословение и соверши Бог твою мысль исполненою во благое дело.

И бояре так же сказали государю и похвалили добрый его совет на благое дело. И тут князь великий начал говорить богомольцу и отцу своему Макарию митрополиту и своим боярам: по твоему отца моего митрополита благословению и с вашего боярского совета, хочу я прежде своей женитьбы поискать прежних своих прародителей чинов, как наши прародители цари и великие князья и родич наш великий князь Владимир Всеволодович Мономах на царство на великое княжение садились[410]. И я потому тот чин хочу исполнить и на царство на великое княжение хочу сесть. И ты господин отец мой Макарий митрополит то дело благослови меня совершить.

И Макарий митрополит слышав то от государя великого князя и благословил его прежних прародителей его чинов искать[411] и на царство на великое княжение благословил сесть. А бояре то слышав, вельми возрадовались, что государь в таком во младенчестве, а прародителей своих чинов великих царей и великих князей поискал.